*ଜନ୍ମାଷ୍ଟମୀ*
ଘନ ଘନ ଘୋର ଡମ୍ବରୁ ବାଜିଲା
ବରଷା ହେଲାଣି ବାଇ,
ଅଷ୍ଟମ ପ୍ରହରେ, ଅଷ୍ଟମ ତିଥିରେ
ଝୁଲି ଝୁଲି ଆସୁ ତୁହି।
ଭାଦୁଅ ମାସ ଟା କି ପୂଣ୍ୟ କରିଲା
ବାଛିନେଲୁ ଦିନ,ବେଳା,
ସପ୍ତ ରାଗରେ ସଦ୍ୟ ଓଁ କାରେ
ଦେଖାଇଲୁ ଲୀଳା,ଖେଳା।
ଦେବକୀର କୋଳ ମଣ୍ଡନ କରିଲୁ
ଧରାକୁ ଛୁଇଁଲା ପାଦ,
ବସୁଦେବ ଙ୍କ ଶୃଙ୍ଖଳ ଖୋଲିଲୁ
ଦେଖି ମନେ ଅପ୍ରମାଦ।
ମୃଦୁ ମୃଦୁ ହାସ୍ୟେ ଆହେ ପୀତବାସ
ଦେଖାଇଲୁ ଜ୍ୟୋତିରୂପ,
ବସୁଦେବ ମନେ ଭରିଲା ବିଶ୍ବାସ
ଦେଖି ତୋର ବିଷ୍ଣୁ ରୂପ।
ଲୀଳା ଭିଆଇଲୁ ବନ୍ଦିଗୃହେ ଶ୍ୟାମ
ଗାଢ଼ ନିଦ୍ରା ଗଲେ ସର୍ବେ,
ତତେ ନେଇ ପିତା ତଡିତ ଚଳିଲେ
ଯଶୋଦା କୋଳେ ସମର୍ପିବେ ।
ହୁଳହୁଳି ଶଙ୍ଖ ଧ୍ବନି ଗରଜିଲା
କଲେ ଦେବ ପୁଷ୍ପ ବୃଷ୍ଟି,
ଚନ୍ଦ୍ର ବଦନ ତୋ ଝଲସି ଉଠିଲା
ବାଃ ବାଃ ରେ ତୋହର ସୃଷ୍ଟି।
କୃଷ୍ଣ ଅବତାରେ ରାଧା ଗୋପୀ ମେଳେ
ନାଟ ଭିଆଇଲୁ ଶ୍ୟାମ,
ମାଖନ ଚୋର ଅପବାଦ ନେଇ
କିଣିଲୁ ସଭିଙ୍କ ପ୍ରେମ।
ଅସୁର ନାଶିଲୁ ଗୋପାଳ ମେଳରେ
ଧେନୁ ବତ୍ସା ପଛେ ଯାଇ
କପଟି କଂସକୁ କରିଲୁ ନିପାତ
ନେଇ ବଳରାମ ଭାଇ ।
ଆହେ ନାରାୟଣ ଅନନ୍ତ ଅସୀମ
ଯଶୋଦା ରଙ୍କ ରତନ,
ଜନମ ଦିନରେ କରୁଛୁ ସ୍ବାଗତ
କୋଟି ପ୍ରଣାଣ ଆମ ଘେନ।
ମିନାକ୍ଷୀ ଦ୍ବିବେଦୀ
୭୯୭୮୦୮୨୮୩୪
Comments
Post a Comment