ଅନନ୍ତ କାଳରୁ ପୁସ୍ତକ ମଣିଷର ଗୋଟେ ପ୍ରକୃଷ୍ଟ ବନ୍ଧୁ । ମଣିଷ ନିଜ ଜୀବନରେ ସାମ୍ନା କରୁଥିବା ପ୍ରତିଟି ସମସ୍ୟାର ସରଳ ସମାଧାନ ବହିରୁ ହିଁ ପାଇଥାଏ। ତେଣୁ ସବୁ ମଣିଷ ବହି ପଢ଼ିବା ଉଚିତ। ଗୀତା ବହି ଠୁ ଆରମ୍ଭ କରି ରାମାୟଣ,ମହାଭାରତ ଏମିତି ଅନେକ ପୌରାଣିକ,ଐତିହାସିକ ,କାଳ୍ପନିକ, ବା ସ୍କୁଲ ସମ୍ବନ୍ଧୀୟ ବହି ପଢ଼ି ବହୁ ବ୍ୟକ୍ତି, ଛାତ୍ର ଛାତ୍ରୀ ନିଜ ଜୀବନର ଜଟିଳ ସମସ୍ୟାରୁ ବାହାରି ପାରିଛନ୍ତି। ଜ୍ଞାନର ବିକାଶ ହୋଇପାରିଛି। ତେଣୁ ବହି ପଢ଼ିବା ଏବଂ ପାଠାଗାରକୁ ଯିବାକୁ ପ୍ରତ୍ୟେକ ନିଜ ଅଭ୍ୟାସରେ ପକାଇବା ଉଚିତ୍। ବହୁ ପ୍ରକାର ପୁସ୍ତକର ସମାହାର ପାଠାଗାର ବା ଲାଇବ୍ରେରୀ। ଲାଇବ୍ରେରୀ ଶବ୍ଦର ବ୍ୟାଖ୍ୟାତତ୍ତ୍ୱ ସୂଚାଇଥାଏ ଯେ ଏହି ଶବ୍ଦଟି ଏକ ଲାଟିନ୍ ଶବ୍ଦ 'ଲାଇବର' ରୁ ଆସିଛି ଯାହାର ଅର୍ଥ ବୁକ୍ ଷ୍ଟୋର୍ | ଗୋଟେ ପାଠାଗାରକୁ ପ୍ରବେଶ କଲେ ମଣିଷର ଚେତନାଶକ୍ତି ଉଦୟ ହୁଏ। ପାଠାଗାର ହେଉଛି ଜୀବନର ଅସଲ ମନ୍ଦିର ଓ ବହି ଜୀବନ୍ତ ଠାକୁର। ଠାକୁରଙ୍କ ପାଖରେ ଆମେ ଯେମିତି ସମର୍ପିତ ଭାବନା ରଖୁଛେ, ବହି ପାଖରେ ସେମିତି ନିଜକୁ ସମର୍ପିତ କରିପାରିଲେ ଆମର ଜ୍ଞାନଚକ୍ଷୁ ଉଦୟ ହୋଇପାରିବ। ଶିକ୍ଷା ସମାଜର ମାନଦଣ୍ଡ। ସମାଜକୁ ଉନ୍ନତ, ମହତ ଓ ପ୍ରଗତିଶୀଳ କରିବାରେ ଶିକ୍ଷା ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥାଏ। ଜୀବନକୁ ସୁସ୍ଥ, ସୁନ୍ଦର କରି ଗଢ଼ିତୋଳିବା ପାଇଁ ଶିକ୍ଷା ହିଁ ପଥପ୍ରଦର୍ଶକ ସାଜିଥାଏ। ଦେଶ ଓ ଜାତିର ...