*ଗଣମାଧ୍ୟମ ଓ ଅମଲାତନ୍ତ୍ର କାହାର ପରାମର୍ଶ ସରକାରଙ୍କର ଏକାନ୍ତ ଉପଯୋଗୀ?*
ସରକାର ଜନତାଙ୍କ ପାଇଁ, ଜନତାଙ୍କ ଦ୍ୱାରା ଓ ଜନତାଙ୍କର। ଏହାର କାର୍ଯ୍ୟକଳାପ ସୁଚାଳିତ ଭାବରେ ପରିଚାଳିତ ହେବା ପାଇଁ ବିଭିନ୍ନ ସ୍ରୋତରୁ ପରାମର୍ଶ ଆବଶ୍ୟକ ହୁଏ। ସେଥିରେ ଗଣମାଧ୍ୟମ ଓ ଅମଲାତନ୍ତ୍ର ସର୍ବପ୍ରଧାନ।
ସାମ୍ପ୍ରତିକ ପରିସ୍ଥିତିକୁ ଅନୁଧ୍ୟାନ କଲେ ଜଣାପଡେ
ଦୁହିଁଙ୍କର ପରାମର୍ଶ ଭିନ୍ନ କ୍ଷେତ୍ରରେ ଏକାନ୍ତ ଉପଯୋଗୀ।
ଆଜିକାଲି ଅଧିକାଂଶ ଲୋକ ସାମାଜିକ ଗଣମାଧ୍ୟମ ବ୍ୟବହାର କରୁଛନ୍ତି। ଏଥିରୁ ଅନୁମାନ କରାଯାଇପାରେ ଆମ ସାଂପ୍ରତିକ ସମାଜରେ ସାମାଜିକ ଗଣମାଧ୍ୟମର ଗଭୀରତା ଅନେକ। ପିଲାଠାରୁ ବୁଢ଼ାଯାଏ ସଭିଏଁ ଫେସ୍ବୁକ, ହ୍ୱାଟ୍ସଆପ୍, ୟୁଟ୍ୟୁବ, ଟୁଇଟର ଭଳି ମାଧ୍ୟମ ସହ ଅଭ୍ୟସ୍ତ ହୋଇଗଲେଣି। ଆଧୁନିକ ଜୀବନ ପ୍ରଣାଳୀର ଏକ ଅବିଚ୍ଛେଦ୍ୟ ଅଙ୍ଗ ହେଲାଣି ସୂଚନା ପ୍ରଯୁକ୍ତି ଓ ସାମାଜିକ ଗଣମାଧ୍ୟମ।
ଗଣମାଧ୍ୟମ ହେଉଛି ଲୋକଙ୍କର ସ୍ବର, ଜନମତର ଆଇନା।
ଗଣମାଧ୍ୟମକୁ ଗଣତନ୍ତ୍ରର ଚତୁର୍ଥ ସ୍ଥମ୍ଭ (Fourth Pillar) ବୋଲି କୁହାଯାଏ। ସମାଜରେ ଯାହା କୁହା ଯାଇପାରେନି, ଯାହା ଦବାଇ ଦିଆଯାଏ, କିମ୍ବା ଯାହା ଅନ୍ୟାୟ ଅନିତି ହୁଏ, ସେସବୁକୁ ଗଣମାଧ୍ୟମ ଜୋରଦାର ଭାବରେ ସରକାର ସମ୍ମୁଖକୁ ଆଣେ। ଏହା ସାଧାରଣ ଲୋକଙ୍କ ଆବଶ୍ୟକତା, ଆକାଂକ୍ଷା, ଅସନ୍ତୋଷ ଓ ଚାହିଦାକୁ ପ୍ରକାଶ କରେ। ତେଣୁ ସରକାର ଯଦି ସଠିକ୍ ନୀତି ତିଆରି କରିବାକୁ ଚାହେଁ, ତେବେ ଗଣମାଧ୍ୟମର ପରାମର୍ଶ ଅତ୍ୟାବଶ୍ୟକ। ଏହା ସରକାରକୁ ଜନମତ ସହିତ ଯୋଡ଼ି ରଖେ।
ଅମଲାତନ୍ତ୍ର ସରକାରୀ ପ୍ରଶାସନର ମୂଳ ଭିତ୍ତି। ନୀତି କେବଳ କାଗଜରେ ରହିଲେ ଚାଲିବ ନାହିଁ, ଏହାକୁ କାର୍ଯ୍ୟକରୀ କରିବାକୁ ଅମଲାତନ୍ତ୍ରର ପରାମର୍ଶ ଅତ୍ୟନ୍ତ ଦରକାର। ପ୍ରଶାସନିକ ଅଭିଜ୍ଞତା, କାନୁନିକ ଜ୍ଞାନ, ଏବଂ କାମ କରିବାର ନିୟମ ସବୁ କିଛି ଅମଲା ମାନଙ୍କ ପାଖରେ ଥାଏ। ସରକାରୀ ଯୋଜନା, ପ୍ରକଳ୍ପ ଓ କାର୍ଯ୍ୟକ୍ରମ ସଫଳ ହେବାରେ ସେମାନଙ୍କର ପରାମର୍ଶ ବ୍ୟବହାରିକ ଓ ଏକାନ୍ତ ଉପଯୋଗୀ। ସେମାନଙ୍କ ବ୍ୟବହାରିକ ଓ ପ୍ରାଶାସନିକ ସୂଚନା ବିନା କୌଣସି ନୀତି ସଫଳ ହୋଇପାରେ ନାହିଁ।
ତେଣୁ ଜନମତ ବୁଝିବାରେ ଗଣମାଧ୍ୟମର ପରାମର୍ଶ ଏବଂ ନୀତିକୁ କାର୍ଯ୍ୟକରୀ କରିବାରେ ଅମଲାତନ୍ତ୍ରର ପରାମର୍ଶ ଦୁଇଟି ସରକାର ପାଇଁ ଆବଶ୍ୟକ।
ଦୁହିଁଙ୍କର ପରାମର୍ଶର ସହଯୋଗରେ ହିଁ ସରକାର ସୁଚାରୁ ଭାବରେ ପରିଚାଳିତ ହୋଇପାରିବ।
ତେଣୁ, ଗଣମାଧ୍ୟମ ଓ ଅମଲାତନ୍ତ୍ର ଉଭୟର ପରାମର୍ଶ ସରକାର ପାଇଁ ଏକାନ୍ତ ଉପଯୋଗୀ। କିନ୍ତୁ ସେମାନଙ୍କର କାର୍ଯ୍ୟକ୍ଷେତ୍ର ଭିନ୍ନ। ଗଣମାଧ୍ୟମ ଦେଇଥାଏ ଜନମତର ଦିଗନିର୍ଦ୍ଦେଶ ଓ ଅମଲାତନ୍ତ୍ର ଦେଇଥାଏ ପ୍ରଶାସନିକ ଦକ୍ଷତା। ଏହି ଦୁହିଁଟିର ସମନ୍ୱୟ ବିନା ଭଲ ଶାସନ ସମ୍ଭବ ନୁହେଁ।
Comments
Post a Comment