ସମର୍ପଣର ଭାବ

( ସମର୍ପଣର ଭାବ )

ଭାବ.. ୧

ପୂର୍ଣ୍ଣ ସମର୍ପଣ ହେଉଛି

ପ୍ରତ୍ୟେକ ଶ୍ୱାସରେ ବିଶ୍ୱାସର ଅର୍ପଣ,

ପ୍ରତ୍ୟେକ ଅଂଶରେ ସୃଷ୍ଟିର ଏକାତ୍ମତା,

ମୋର ଓ ତୋର ରେ ନ ଥାଏ ଭିନ୍ନତା

ସମର୍ପଣରେ ହୁଏ ସତ୍ତାର ଆଭାସ

ସତ୍ତା ବିନା

କିଏ ତୁ ? କିଏ ମୁଁ ?

କିଏ ଅନ୍ଧାରର ମାଲିକ ?

କିଏ ଆଲୁଅର ଦାସ ?

ଏହା ନୁହେଁ କେବଳ ବାହ୍ୟ ଅର୍ପଣ,

ଏହା ନୁହେଁ ଆତ୍ମ ନିବେଦନ ଅବିବେଚିତ ମନ

ଏହା ହେଉଛି ଅନ୍ତସ୍ଥ ଶାଶ୍ଵତ ଦାନ,

ଏହା ହେଉଛି ଭାବର ଏକ ଶ୍ରଦ୍ଧାସ୍ପଦ ଆନ୍ଦୋଳନ,

ଏକ ଶବ୍ଦହୀନ ଗୀତ, ଏକ ଅବିରାମ ସ୍ନେହ ପ୍ରବାହ,

ଏକ ଅନୁପସ୍ଥିତି ମଧ୍ୟରେ ଅନନ୍ୟ ଉପସ୍ଥିତି

ସମର୍ପଣ....ନିରବ ହୃଦୟରେ ଜନ୍ମ ନିଏ ଆଶା,

ଅସ୍ତିତ୍ୱର ଅନ୍ତସ୍ଥଳୁ ଫୁଟେ ଆଲୋକର ଭାଷା

ସମର୍ପଣ — ନୁହେଁ ଦୂର୍ବଳତାର ଚିହ୍ନ,

ସେ ହେଉଛି ଆତ୍ମାର ସ୍ଵଚ୍ଛ ପରିଚୟ।

ଭାବ...୨

ନୁହେଁ ମୁଁ ରାଧା,କି,ମୀରା,କି ଅହଲ୍ୟା କି ରୁକ୍ମିଣୀ 

ମୋ ସମର୍ପଣ ହେଉଛି ନ ଦେଖା ଯାଉଥିବା ଯୁଦ୍ଧ,

ନିରବରେ ଲଢିଥିବା ଆନ୍ତରିକ ବିଜୟ,

ମୋର ଶୂନ୍ୟତା ଭରିଛି ତୁମର ଅନୁଗ୍ରହ,

ସମର୍ପଣ ଶିଖାଇଛି ପ୍ରେମ ଓ ଶାନ୍ତିର ଅର୍ଥ

ମୋର ଗର୍ବ, ମୋର ଅଭିମାନ,

ସବୁ ତୁମ ପାଖରେ ନିବେଦିତ

ମୁଁ ତୁମେ ହେବାକୁ ଚେଷ୍ଟା କରୁନି,

ମୁଁ ମୋ ସତ୍ତାକୁ ବିସ୍ମରି

ତୁମର ସତ୍ୟକୁ ଗ୍ରହଣ କରୁଛି

ବିଲୀନ ହେଉଛି ତୁମର ଅଭେଦ ଆକାଶରେ...

ମୋ ଅସ୍ତିତ୍ୱରେ ଅଛି କେବଳ ତୁମ ନାମ,

ଯାହା ଶ୍ବାସରେ ଆସେ ଓ ଶ୍ବାସରେ ହିଁ ଲୟ ହୁଏ।

ଚାଲିବି, ଅନ୍ତିମ ଶ୍ୱାସ ପର୍ଯ୍ୟନ୍ତ

ମୁଁ ଚାହିଁବି ଏକ ଅନୁଭବ

ଯେଉଁଠି ମୁଁ ନାହିଁ, ମାତ୍ର ତୁମେ ଅଛ,

ଏହି ଯାତ୍ରା ମୁଁ ଆରମ୍ଭ କରିଛି ଏବେ

ଯେଉଁଥିରେ ମୁଁ ମୋରେ ନୁହେଁ — ମୁଁ ହେଉଛି ତୁମେ।

ଏହା ହେଉ ମୋର ସର୍ବାନ୍ତ ସମର୍ପଣ,

ସମର୍ପଣ ମୋର ପରିଚୟ,

ତୁମ ପ୍ରେମ ହେଉ ମୋର ମୁକ୍ତିପଥ।

ମିନାକ୍ଷୀ ଦ୍ବିବେଦୀ 

୭୯୭୮୦୮୨୮୩୪

ଗୁରୁ ଗ୍ରାମ